Мамлакатда турли миллат ва элат вакилларининг ҳуқуқ ва эркинликларини таъминлаш, уларнинг миллий маданияти, тили ва анъаналарини асраб-авайлашга алоҳида эътибор қаратилган.

130 дан ортиқ миллат ва элат вакиллари аҳил-иноқ яшаб келмоқда. Улар фаол иштирок этаётган жамиятда ҳозирги кунда 157 та миллий маданий марказ фаолият юритади. Ушбу марказлар миллий урф-одатлар, тил ва маданий меросни ривожлантириш ҳамда халқлар ўртасидаги дўстликни мустаҳкамлашга хизмат қилмоқда.
Миллатлараро муносабатлар ва хорижий мамлакатлар билан дўстлик алоқалари қўмитаси давлат сиёсатини амалга оширувчи асосий орган ҳисобланади. Қўмита миллий маданий марказлар фаолиятини мувофиқлаштиради, дўстлик жамиятлари билан ҳамкорлик қилади ҳамда миллатлараро муносабатларни ривожлантиришга қаратилган дастурларни амалга оширади.
30 июль – Халқлар дўстлиги куни муносабати билан ҳар йили республика бўйлаб "Дўстлик" фестивали, маданий тадбирлар, кўргазмалар, ижодий учрашувлар ва концертлар ташкил этилади. Бу тадбирлар турли миллат вакилларининг ўзаро ҳурмати ва бирдамлигини мустаҳкамлашга хизмат қилади.
Тошкент шаҳрида Миллий маданий марказлар павильони барпо этилди. Унда 22 миллатнинг миллий уйлари, маданий экспозициялари, халқ амалий санъати намуналари ва миллий анъаналари намойиш этилган. Павильон мамлакатдаги миллатлараро тотувликнинг амалий ифодаси сифатида фаолият юритмоқда.
Ёшлар ўртасида бағрикенгликни тарғиб қилиш мақсадида "Ўзбекистон – миллатлараро тотувлик ва диний бағрикенглик юрти" мавзусида фестиваллар, интеллектуал танловлар, очиқ мулоқотлар ва маънавий-маърифий тадбирлар мунтазам ўтказилмоқда.
Оммавий ахборот воситалари ва таълим соҳасида кўп тиллилик қўллаб-қувватланади. Миллий телерадио дастурлари бир нечта тилларда эфирга узатилади, газета ва журналлар турли тилларда нашр этилади. Бу ҳар бир миллат вакилининг ахборот олиш ҳуқуқини таъминлашга хизмат қилади.
Турли миллат вакиллари давлат бошқарувида ҳам иштирок этмоқда. Давлат фуқаролик хизматида турли миллат вакиллари фаолият юритади, парламент ва маҳаллий Кенгашларда ҳам бошқа миллат вакиллари депутат сифатида иш олиб бормоқда.
Илмий-эксперт платформалари ташкил этилмоқда. Миллатлараро тотувликни янада мустаҳкамлаш, миллий қадриятларни асраш ва бағрикенглик маданиятини ривожлантириш мақсадида олимлар, социологлар, сиёсатшунослар ва бошқа мутахассислар иштирокида доимий мулоқот майдонлари йўлга қўйилган.
Ушбу чора-тадбирлар Ўзбекистонда миллатлараро тотувлик ва фуқаролик бирдамлигини мустаҳкамлаш, турли миллат вакиллари учун тенг имкониятлар яратиш ҳамда жамият барқарорлигини таъминлашга қаратилган давлат сиёсатининг муҳим йўналишларини ташкил этади.